صوت مدفون..." شعر عامي "

من طرف mimo الخميس يوليو 31, 2008 2:06 pm

فى عز العتمة جوايا
سمعت بصوت ينادينى
بيصرخ فيا ويزلزل
فى وجدانى وتكوينى
ويستعطف ويسترحم
وصوته فيا .. صوت ميت
بحِسه ليه بيحيينى
ويعلى الصوت
و مش عارف أرد بإيه
ومن صوته
أنا خايف أكون عارفه
وكل جراحه دى بتدبح
ومش حاسه
ولا لامسه
وراح نَفَسه
ما بين الأه وأوجاعه
ما بين الحزن وصراعه
وأنا ساكت
أقول أنطق؟
دا صوتك جاى م العتمة
لا أنا شايفك
ولا سامعك
يا خوفى يكون دا صوت مدفون
وأنا نسيت إنه كان منى
وكان بجراحه متكلفت
لساعة رحمة مستنى
يدارى فى الضلام خوفه
يشيل الهم بكفوفه
ويحلم لحظة يتحرر
يعيش العمر متهنى
ويوصل يوم أنين صوته
بيبان القلب من جوه
بقول سامعك
بقول شايفك
أقول الذنب دا ذنبى
وأنوَّر عتمتك بإيديا وأمحيها
وخُد إيدى نِهد هموم نعديها
وتبقى العتمة نور أبيض
تلاقى دنيتك جواه
وينبضلك بنبض حياه
ودلوقتى أنا إتاكدت من حِسك
وأنا شايفك
وأنا لامسك
وأنا حاسك
أتارى الصوت دا صوت مدفون
وأنا نسيتك يا صوت قلبى

__________________

أيها المواطنون
أيتها المواطنات
مصر من طول السكات
تناديكم
تسمعـــــــــــــــــــــــون